حجاب بنت لطيفة ونقاب بنت نجيبة

حجاب بنت لطيفة ونقاب بنت نجيبة
شاهد أو حمل هذا المقطع والمزيد على يوتيوب بدون دعايات

يا صباح الحب والسعادة والصحة والعافية والخير يا قراء الخير، اول شي اسمحوا لي ان اقول شكرا من القلب لكل مشاعر الحب اللي لمستها في الفترة اللي طافت، واللي طبعا ما هي غريبه عليكم، شكرا على السؤال، شكرا على الدعاء، شكرا على العنوة، شكرا على التوصيات اللي اوصلت لنوخذة جراحة العيون الدكتور خالد السبتي، واللي للأمانه ما يحتاج توصية، لأنه من الناس اللي يخافون الله، بالأخير شكرا وايد يا أغلى قراء عساني ما انحرم منكم ولا من محبتكم، وايد ممتنة لكم عسى ربي لا يروعكم على غالي ويديم عليكم الصحة والعافية.


طبعا بالفترة اللي طافت وايد امور اشهدتها ساحة المجتمع الكويتي، واللي اتخلي عيون الواحد بقمة راسه، طبعا انا من العملية عيني تلقائيا كانت بقمة راسي، وزادت اكثر لما كنت اقرأ واسمع اللي قاعد يصير بوطني الغالي، طبعا ما راح اطوف ولا شي من الأشياء الفلته اللي صارت، وراح ابدى اكتب عنها بالترتيب، بس اليوم ببدى بسالفة «نقاب بنت نجيبة» اللي الظاهر انها مو راضية تجيبها البر على قولة خفاف الطينة ابناء مصر المحروسة.


«لوياك» تشوّه المجتمع الكويتي!

اول شي قبل لا ابدى واتكلم عن لوياك وعن اللي سوته للمجتمع ابي اقول حق الغالية فارعة السقاف: انا اسفة جدا ومسحيها في ويهي على كل كلمة كدرت خاطرج، وعلى كل همز ولمز اكتبوه بحقج، لأن اللي ما يعرفك ما يثمنك وانا متأكدة ان «تابعه قفة» اللي اكتبوا في تويتر وربعه من فئة اللي كاشخين غلط، ما يعرفونج ولا يدرون منهي فارعة السقاف.

الهجوم اللي تعرضت له القديرة الأستاذة فارعة السقاف، رئيسة مجلس ادارة منظمة لوياك المميزة، على مدى الأسبوعين اللي طافوا، واللي كانوا معظم ابطاله بعض رافعي شعار الأمر بالمعروف والنهي عن المنكر من ربع قال الله وقال الرسول، واللي ما يعرفون الله ورسوله الا بشيين: إما الدين حلل اربع، ولا للرجل مثل حظ الأنثيين، شي جدا مضحك وجدا يفشل بنفس الوقت، لأنه اللي يقرأ التعليقات يعرف من اول حرف ان هذا الشخص ما عنده ما عند يدي فايز رحمة الله عليه، يعني المخيخ الأيمن والأيسر فاضين بس على قولة المثل «مع الخيل يا شقرا»، شاف الطير المدلقم كله كاتب «لوياك تشوه المجتمع»، قام وكتب وصار منهم واهو لا يدري شنهو لوياك ولا منهي فارعة السقاف، ولا عنده خبر شنو قايله ولا شنو امسويه.

والحين حق اللي شادين حيلهم وقالوا «لوياك تشوه مجتمعنا» على اساس ان ماشاء الله تبارك الرحمن مجتمعكم فاضل وكامل والكامل الله، ابي اقول لكم شنهي لوياك وشنهي فعايلها؟

لوياك منظمة غير ربحية، تعمل من اجل التنمية الشاملة والمتكاملة للشباب، يعني لوياك واللي فيها ناس تارسين مكانهم وكراسيهم مو المكان ولا الكراسي اللي تترسهم، لوياك واللي فيها هدفهم يشوفون الكويت وشبابها بأحسن المراتب، ويحققون افضل المراكز لأنهم يؤمنون بالشباب الكويتي وقدراته، لوياك واللي فيها يشتغلون بمبدأ سو خير وقطه بحر، ويشتغلون بصمت من غير تلعلع ولا Show ولا كاميرات تصوير وفلاشات وغيرها، لوياك واللي فيها اقدروا انهم يسجلون اسم الكويت بمحافل دولية، واقدروا يحصلون على جوائز لو تنحدبون ما تقدرون تاخذون ربعها، لأنهم حاطين الكويت واهلها وسمعتها جدام عينهم، لوياك واللي فيها اقدروا انهم يخلون الكويت كلها عن بكرة ابيها تبتسم بنفس الوقت من الشراحة والأناسة اللي يسوونها بحفلاتهم ومناسباتهم، من غير تذاكر تنباع بالسوق السوده ولا واسطات وحب خشوم، لوياك واللي فيها اقدروا بمناسباتهم اللي ينظمونها يخلون الشعب الكويتي كله يتحد ويصير على قلب واحد، لأن بحفلاتهم يقعد عباس يم عمر، ومزنه يم سبيجه من غير لا يفكرون ولا يترددون، وباخر المتمه يردون بيوتهم ويحطون راسهم على مخادهم والكشرة شاقه حلوجهم، لوياك واللي فيها اطلعت منها المتميزة الخلوقة ساره فهد بوشعر اللي ابهرت العالم كله بمنتدى الشباب واهي تلقي خطاب جدام الرئيس المصري عبدالفتاح السيسي، ووصلت رسالة بكل ثقة ان الكويت لها شبابها المميز ولها ناسها اللي تحبها، هذي بعض فعايل وعمايل لوياك اللي تقولون انها تشوه المجتمع الكويتي، ابي اعرف انتو يا فلتة زمانكم شنهي فعايلكم اللي خلتنا نقتحم العالم من اوسع بيبانه؟


نقـــاب بنت نجيبة!

ما يجوز، خلوا كل شي سوته لوياك ورئيستها والطاقم المميز اللي معاها، واقضبوا سالفة ان فارعة تهاجم النقاب وتسيء للحجاب، لمن تداولوا مقطع من مقابلة ممتعة للمبدعة فارعة السقاف تتكلم فيها بكل صراحه وجرأة.

انا، والعياذ بالله من كلمة انا، ما اشوف قالت شي غلط بالمقابلة، ولا اشوف اي إساءة لا للدين ولا للمجتمع الكويتي، وبعدين هذا رأيها واهي لها مطلق الحرية فيه، لأن احنا بوطن يؤمن بحرية التعبير ولا نسيتوا؟ ولا الحرية بالتعبير بس على الأمور اللي تخصكم وتيوز لكم وتمشي على هواكم؟

فأتوقع سالفة اللعب على وتر الدين ولوياك تشوه المجتمع الكويتي، وفارعة السقاف تسيء للكويت واهلها وايد شي سخيف ومضحك، لأن اذا بنتكلم عن اللي سوته لوياك وفارعة واشلون اقدروا يحتوون الكثير من الشباب ويخلونهم يواجهون العالم بكل ثقة ماراح اتكفيني صفحات القبس، فركدوا وخلوا عنكم لوياك المحبة والسلام، لأنكم منتو قدها ولا تفتحون على روحكم بيبان عمركم ماراح تقدرون اتسكرونها.


حجاب بنت لطيفة!

وبما اني تكلمت عن نقاب بنت نجيبة، فزلقه بطيحه خل اهذر عليكم على حجاب بنت لطيفة، وحده من الملاقيف اللي جمعني معاها مقعد قبل اسبوع، واللي لأول مره اشوفها بحياتي، وان شاء الله تكون الأخيرة، لأنه كلش مقعدها ما فيه من الشراحة ولا الأناسة مقز ابره، قالت لي بالفم المليان وبدون اية مقدمات ولا معرفه وبأسلوب مليق مثلها «روابي ليش ما تتحجبين»؟، لمن اسألت السؤال ما إسالته بيني وبينها، قالته على مسمع ومرأى الحضور وبالصوت الحياني كأنها خالد الحربان، الله يذكره بالخير واهو منهار من الأناسة بمباراة القادسية والعربي، وتحديدا عقب ما شات المرعب جاسم ولد يعقوب شوتة سحرية مكوكية خلت حارس العربي تطير بوهته، بس الفرق بين العزيز خالد الحربان وبين اللي سألت السؤال، ان صوت خالد الحربان كان مصدر سعادة وصوتها كان مصدر تعاسة.

فالأخت ام سؤال ماصخ، عقب ما قطت اللي بقلبها لسان حالها يقول انا اشسويت؟ انا شاللي قردني وخلاني اسألها هالسؤال، لأنها شافت النار والشرار اللي اطلعوا من عيني المخيطة، والوان قوس قزح اللي تلون فيها ويهي، فعلى طول اقلبت الموجة وصارت فاتن حمامة، رحمة الله عليها، وتحديدا في فيلم «لا أنام»، وبتحديد ادق باللقطة اللي تقول فيها حق محمود مرسي- ابوها- بصوت كله استكانة وكسرة خاطر وحنان «انت لازم تطلقها يا بابا لأنها ما تستهلكش» عن مريم فخر الدين.

بس الاخت السائلة، جزاها الله خير، خذت نبرة الصوت وغيرت الكلام فقالت «روابي ماشاء الله عليج كل شي فيج زين بس ناقصج شي واحد وتكملين والكامل الله، تتسترين وتلبسين الحجاب علشان الله يرضى عليج».

الصراحة، ما اخش عليكم، وانا اسمع كلامها والدراما اللي اهي فيها، انا نفسي كسرت خاطر نفسي من زود التأثر والتعبر اللي شفته منها واهي تكلمني، لدرجة اني حسيت اني حفيدة ابو لهب، واني من راسي ليمن كرياسي متروسة معاصي، بس الحمد لله والشكر لله فجأة رجعت حق عقلي ورجعت لأرض الواقع واستوعبت شنو اللي قاعد يصير وشنو الخرابيط اللي قاعدة تهذري فيها هذي الاخت المحجبة الفاضلة.


اشوله أتحجب؟

عقب ما خلصت الاخت من بلاغة شفها، تعدلت بقعدتي وخذيت شهيق عميق وطلعت زفير اعمق، وجابلتها عدل ولوفحت بشعري اللي توني كنت مايطته ومسويتهBeach Waves وقلت لها: سكوزمي- بصوت خفيفة الطينة فيفي بنت حجي عبده- وليش اتحجب؟

طبعا اهي بققت عينها من سؤالي اللي ماتوقعته، وقالت: استغفري ربج روابي، الحجاب واجب عليج الله يهداج، شلون تقولين هالكلام؟ تبين الله يغضب عليج؟ قلت لها: اول شي الله يحبني ومستحيل انه يغضب علي لأنه رحيم عطوف، بعدين يا اختي الفاضلة ياللي عطيتي نفسج حق مو حقج انج قررتي ان الله غاضب علي لأني مو متحجبة، انتي شنو تعرفين عن علاقتي بربي؟ انتي شنو تعرفين عن نيتي؟ علشان تقررين اني من المغضوب عليهم واني مطرودة من حب الله؟

وعلى سالفة الواجب، وايد اشياء بالدين واجب والمفروض انتي اولى بتطبيقها كونج متحجبة وتعرفين الواجب ومرضي عنج حسب كلامج من الله، فعلى سبيل المثال لا الحصر طبعا، احترام خصوصيات الناس واجب اوجبه الاسلام عليج، والمفروض انج ما تدخلين عصج بشي ما يخصج علشان لا تسمعين اللي ما يسرج؟ تقظبين ارضج وتقعدين بالبيت واجبه بالإسلام عدل ولا لأ؟ يعني مو اربع وعشرين ساعة تتفرفرين من قهوة لي مطعم لي مجمع لي معرض.. لأن ما يصير تطلعين الا للضرورة علشان ما تثيرين الفتنة ولا تحركين المشاعر في نفوس الرجال جزاج الله خير، عدل ولا مو عدل؟ انه يصير بينج بين الحش والقراض بالأوادم علاقة محرمة عدل ولا مو عدل؟ انج تتمنين الخير لغيرج مثل ما تتمنيه لروحج عدل ولا مو عدل؟ يعني ما تحسدين ولا تغبطين فلانه ليش تزوجت ولا ليش ترقت ولا ليش حطت ولا ليش شالت، اتوقع هذي شوية من الاشياء الواجبة مثل الحجاب اللي قاعدين اتخشون جم الشعره اللي على روسكم فيه هالأيام عدل ولا مو عدل؟

طبعا انا ما اعمم، لأن اكو محجبات ماشاء الله ينحطون على الجرح يطيب، مثل النسمة شوفتهم تشرح القلب وتسر الخاطر وترد الروح، واكو بعض المحجبات اللهم ياكافي امنصبين عمرهم ملائكة السماء بالأرض وفوق شينهم قواة عينهم، يعني جان زين انهم املوتين راسهم بالحجاب اللي عليه وساكتين، لا، ما بقى شي مو رازين عمرهم فيه ولا بقى داعوس ما تلقاهم فيه، هذيله اولى انج اتروحين تسألينهم ليش انتو محجبات؟ او بالأحرى شنهو يعني الحجاب عندكم؟

فأنا بقلب الآية وبسألج يا صاحبة الحجاب ياللي ان شاء الله ربج راضي عليج، بما إنج نصبتي عمرج ملا مرشد رحمة الله عليه، وقمتى تقولين تحجبي علشان ربج لا يغضب، بعض الأسئلة اللي اتمنى انتي تردين عليها بكل صراحة اذا عندكم الشجاعة:

• ليش نسبة اللي يفصخون الحجاب بمعدل يومي بالكويت كل مالها بتكاثر مستمر؟

• الحجاب اللي نشوفه هالأيام هذا اللي وصى عليه الإسلام وهذا اللي يخلي ربي يرضى علي؟

• لما أغطي شعري بحجاب متروس افصوص تبرق كأنها ليتات عرس سعد بن عبدالرزاق العاقول، اللي علقهم على بيتهم لما خذا صالحه بنت بوصالح، هذا الحجاب اللي بخلي ربي يرضى عني؟

• الحجاب اللي راح يخلي ربي يرضى عني اني اخش شعري وارصص عمري ببنطلون ضيق وبلوزه امقصمله وثلاثة ارباع ايدي طالعه علشان اتبين ساعتي والأساور اللي متشكشكه فيهم؟

• هل الحجاب اللي راح يخليني اتربع في الفردوس الاعلى حسب نظريتكم المهزوزه اني اغطي راسي بخرجه واقطع يمب الناس بالحش والقراض والحسد والقيل والقال وقلبي متروس جغاله وبلاسه على خلق الله؟

فأنا اتحدى البعض يجاوبون على سؤال واحد من اسئلتي، تدرون ليش؟ لأنكم ما تدرون وين ربي قاطكم ولا فاهمين انتو اشحقه لابسين الحجاب، وعمركم ما راح تفهمونه ولا راح تقدرون انكم تقنعون احد فيه، لأن انتو نفسكم مو مقتنعين فيه، علشان جذي اقول: كل وحده فيكم تلبس حجابها عدل وتطل في ييبها وتعرف عيبها احسن وايد من بلاغة الشف والتدخل والتبحلق بخصوصيات وحياة خلق الله، والمفروض انكم اتعرفون ان علاقة المرء بربه علاقة خاصة جدا، مو المفروض انكم تتدخلون فيها، وبعدين اذا كنتو ماخذين السالفة من باب الأجر والثواب المفروض انكم اتعرفون ان الدين نصيحة مو تخويف وترهيب وهجوم وسب وغيرها من الأمور مالتكم.


روابي البناي